Aroyi.org

Menua

• Hasiera
• Ezagutu proiektuak
• Proiektu bat sortu
• Bilatu
• Komunitatea
  • Ekintza
  • EMPRENDIMIENTO JUVENIL
  • FECD
• Sartu

• Goteo-ri
  buruz
• Proiektuei
  buruz
• Bultzatzaileentzat
• Finantzakideentzat
• Bertoko
  nodoei buruz

Proiektuei buruz

1. Nolako proiektuak dira onargarriak?

   Aroyi plataforman askotariko proiektuak proposa daitezke. Helburu sozialak, kulturalak, zientifikoak, hezkuntzarekin lotutakoak, teknologikoak edo ekologikoak dituzten ekimen berritzaileak eta sortzaileak; beren inguruan komunitatea sortzen eta guztion jabetza, kode irekia edo/eta ezagutza librea garatzen laguntzen dutenak, ahal beste pertsonarentzat onuragarria izateko.
   
   “ADN irekia” duten orotariko proiektuetara bideratuta gaude: kultura librea, gizarte-ekintza, software eta hardware libreak, ekonomia alternatiboa, arkitektura, gastronomia, ikerketa, permakultura, ekintzailetza; itzulkin kolektiboen bidez guztion ondasunak aberasten laguntzen dutenak, lizentzia libreak edo/eta irekiak erabiliz (adibidez, Creative Commons edo GPL). Hau da, babesa eta baterako finantzaketa bilatzen dituen jarduerarekin lotutako informazioa, ezagutza, prozesuak, emaitzak, erantzukizunak, ongintzazkoak, eduki digitalak eta beste baliabide batzuk konpartitzeko helburua duten ekimenak.
   

2. Gizartearen ongizatea vs. guztion jabetza. Zer desberdintasun dago?

   Oso ñabardura garrantzitsua da! Proiektu batzuk gizartearentzat oso mesedegarriak izan daitezke (gizartearen ongizatea) eta toki edo komunitate jakin batzuetan aldaketa positiboak eragiteko helburua dute, baina Aroyi ez dago bideratuta ekimen solidarioetara edo sozialetara ekimen horiek ez badute itzulkin kolektibo argi bat sortzen.
   
   Hau da, proiektua beste pertsona batzuei transferitu ahal zaiela eta ezagutza librea arautzen duten askatasunen arabera berriz erabil dezaketela ziurtatzen duten ekimenak bultzatzen ditu (jabetza komuna), normalean lizentzia libreak eta irekiak izaten dituztenak.
   

3. Nolako proiektuak EZ dira argitaratzen Aroyin?

   Aroyi ez dago irabazi-asmo hutsa duten proiektuak finantzatzera bideratuta, ezta produktuak edo zerbitzuak saltzeko prozesuak, zozketa-kanpainak, kanpaina politikoak edo ongintzazko ekimenetarako funtsak biltzeko kanpainak barne hartzera ere.
   
   Crowdfunding plataforma gehienak bezala, Aroyiren helburua ez da desegokiak, delituzkoak edo pertsonen duintasunaren kontrakoak diren proiektuak sustatzea edo finantzatzea.

4. Zergatik erabili lizentzia libreak edo/eta irekiak?

   Proposatutako ekimenek guztion jabetza, kode irekia edo/eta ezagutza librea indartzen laguntzen dutela ziurtatzeko, Aroyiren laguntzarekin finantzatu eta garatu nahi duten proiektuak dauden lizentzia libre edo/eta irekietakoren batekin pentsatu, sortu edo banatu behar dira.
   Lizentziak lagungarriak dira proiektuen “arrasto digital”erako, eta zehazpen edo muga desberdinak dituzte; eta bereziki ahalbidetzen dute sorkuntza bakoitzaren zati bat edo osoa kopiatzea, publikoki ezagutzera ematea, banatzea, aldatzea edo/eta ustiatzea. Lizentzia libreek edo/eta irekiek jatorrizko egilea babesteaz gain, sorkuntzen erabilerak kontrolatzeko aukera ematen dute, eta, gainera, kopiatzeko eta ezagutzera emateko mekanismo bat dira, jarraitzaileen, ekoisumitzaileen eta ekimenak ezagutzera ematen dituztenen sareetan oinarritzen dira eta sare horiek elikatzen dituzte.
   
   Ondasun komunen gero eta iturri aberatsagoa eta anitzagoa da, eta, bertan, pertsona askok inspirazioa, talentua eta orotariko baliabideak bilatzen dituzte (hezkuntzarekin lotutakoak, artistikoak, dokumentalak, etab.). Hori guztia dela eta, eta kontuan hartuz Aroyik proiektuen ideiak izateagatik eta sortzeagatik sariak bermatzen dituela (paraleloki beren iraunkortasun ekonomikorako mekanismo propioak izan ditzakete), lizentzia irekiak edo/eta libreak ez direla kaltegarriak uste dugu, are gehiago, proiektuentzat eta horien sustatzaileentzat eta, ondorioz, gizartearentzat mesedegarriak besterik ez direla pentsatzen dugu.
   
   Aroyitik lizentzia batzuk proposatzen ditugu eta horien inguruko aholkularitza eskaintzen dugu: Creative Commons (CC), General Public Licence (GPL), GNU Affero General Public Licence (AGPLv3), Open Database (ODBC), Sare Irekia Librea Neutral Lizentzia (XOLN), Open Hardware Licence (OHL), etab. Lizentzia horien eta beste batzuen edukia Creative Commons-en, Free Software Foundation-en eta Safe Creative-n kontsultatu ahal duzu.

5. Horrek guztiak oso itxura ona du, baina nola “ireki” dezaket nire proiektua?

   Ezagutza librearen mundua aukeraz beteta dago, baina ez dira beti erraz aurkitzen eta aplikatzen ez bazaude arlo irekiko parametroekin lan egitera ohituta. Hori kontuan hartuz, Aroyik proiektuak inskribatzeko prozesurako gida bat eskaintzen du, eta, bertan, sustatzaileak pauso bakoitzean hartu behar dituen erabakien eta eskaini behar duen informazioaren garrantzia azaltzen da.
   
   Ez bazaizu nahikoa iruditzen, hitz egin dezagun. Fundación Aroyien helburua da esparru sozialean, kulturalean eta ekonomikoan guztion jabetza, kode irekia eta ezagutza librea sustatzea, ikerketa aplikatua bultzatzea eta ezagutzera ematea. Hori dela eta, pertsona eta erakunde sustatzaileei laguntza eta aholkularitza espezializatua eskaintzen diegu beren proiektuak osatzeari eta egokitzeari buruz: lizentzia-motak, itzulkin kolektiboak, produktu berriak eta zerbitzu eratorriak, etab. Aholkularitza hori Fundazioak eta gai zehatz batzuetan adituak eta zale sutsuak diren pertsonen komunitate batek eskaintzen du.

6. Beldur naiz norbaitek nire ideia edo proiektua plagiatuko ote duen. Zer egiten du Aroyik hori saihesteko?

   Ezer baino lehen, aintzat hartu behar duzu crowdfundinga, oro har, nabarmentzen ari diren ideiak edo proiektuak publikoki ezagutzera emateko dela, eta horrela, ekarpen txikien bidez, Interneten bitartez aurrera eraman nahi direla. Gainera, Aroyik guztion jabetza, kode irekia eta ezagutza librea sustatzen ditu, sortzen dena konpartitzea eta sortzen denaz bizitzea ez direla bateraezinak defendatzen baitu.
   
   Itzulkin kolektiboak erakartzeko polo bat sortu nahi dugu, plagioak beharrean gauza erabilgarriak berriz erabiltzeko, inspiratzeko, ikasteko eta gizartea batera garatzeko. Ondorioz, ezin baduzu esan zer egin nahi duzun edo/eta ez baduzu konpartitu nahi nola egin nahi duzun itzulkin kolektiboen, lizentzia irekien edo libreen bitartez, agian Aroyiren bidezko finantzaketa ez da aukerarik onena zuretzat.
   

7. Eragina edo komunitatea Espainiatik kanpo dituen proiektu bat aurkez dezaket?

   Jakina. Espainiar lurraldeko muga hori behin-behinekoa da, eta alderdi teknikoekin dago lotuta, lortutako finantzaketaren ordainketaren tramitearekin, hain zuzen. Hau da, Aroyin ekimenaren sustatzaile gisa alta hartzen duenak Espainian banku-kontu bat izan behar du, baina proiektuak beste edozein lurraldetan gauza daitezke edo izan dezakete eragina.
   
   Baina antzeko proposamenak aurkeztuko balira, Aroyiren asmoa tokikoa hurbiltasun geografikoarekin indartuz haztea denez, baliteke azken erabakia hartzean (proiektua plataforman argitaratzea edo ez argitaratzea) hurbilekoenak lehenestea.
   

8. Aroyin proiektu bat baino gehiago izan ditzaket kanpaina egiten?

   Kanpaina egiten ez, baina proiektu bat baino gehiago izan ditzakezu editatzeko prozesuan edo balorazio-prozesuan. Normalean, garrantzitsuena eta eraginkorrena proiektu bakarrean kontzentratzea da. Gainera, Aroyin proiektu bakoitzak 40 eguneko finantzaketa-txanda bi ditu, eta ekimenaren alde apustu egin behar da eta gogor egin behar da lan bakoitza ezagutzera emateko eta aurrerapenak lortzeko. Gainera, lehenengo beta fase horretan baloratzen duguna aniztasuna da, ideien aniztasuna nahiz pertsona eta talde sustatzaileen aniztasuna; hortaz, momentuz sustatzaile bakoitzak proiektu bat bakarrik izan dezake kanpaina egiten.
   

9. Proiektu bat aldi berean plataforma batean baino gehiagotan egon daiteke?

   Baietz uste dugu. Gure aldetik, behintzat, ez dago arazorik :) Are gehiago, uste dugu dagoeneko behin baino gehiagotan gertatu dela, eta proiektu askoren modulartasunak ahalbidetzen du (produktu edo prozesu eratorriak eta osagarriak izan ditzakete, hezkuntzarekin lotutako potentzialarekin, ikerketakoarekin, ludikoarekin, marketinekoarekin, beste euskarri edo formatu batzuetara aldatuz, etab.).
   
   Horretarako, gomendagarriena beste plataforma batzuk eta babesten dituzten proiektu motak aztertzea da. Baina egutegi bat eta proiektuaren xehetasunak (faseka edo azpi-produktuka banakaturik) aintzat hartu behar dituzu, ez daitezen bi kanpaina bi plataformatan gainjarri, nahasmena eta mesfidantza sor dezakeelako finantzakide potentzialen artean.